पावसाचंही गुगलिफाय, कार्यक्रम न होताही भेटवस्तू प्रदान.

- दीपा कसा झाला कालचा वेध कट्यावरचा कार्यक्रम?
- काय झालं ना, मी घरातून निघाले, तेव्हा बारीक झिमझिम पाऊस सुरू होता
- हो, पण कार्यक्रम कसा झाला...
- पोहोचायला साडेपाच वाजले, पाचच मिनिटांत धनू आणि चैतू देखील आले
- हो, पण कार्यक्रम कसा झाला...
- दोघंही चिंब भिजले होते, ठरवल्यानुसार आम्ही काळ्या रंगाचे कपडे घातले होते.
- हो पण कार्यक्रम वेळात सुरू झाला ना, की थोडा उशीर झाला?
- किरकोळ म्हणून बघावं, तो पाऊस मुसळधार, राक्षसी स्वरूपात कोसळू लागला....
- मग
- तेवढ्यात रेनकोट, छत्रीसह पूर्ण भिजून शंकर आला, सुयश आला....झालंच तर...
- किती लोक आले?
- तेवढ्यात पळशीकर सरांनी गरमागरम भजी मागवली
- कार्यक्रमाचं काय?
- आम्ही भजी खाल्ली, दोनदा चहा झाला....
- हो पण कार्यक्रम?
- पळशीकर सरांनी आणि प्रदीप कुलकर्णी यांनी चैतुला आणि मला भेटवस्तू देखील दिली
- का...
- कार्यक्रम ना? तो कसा होणार? पावसानं कोणाला येऊच दिलं नाही. त्यानं चैतुऐवजी स्वतः एकट्यानंच 'गुगलिफाय सादर केलं!’
दीपा देशमुख, पुणे